कासा उपजिल्हा रुग्णालयात जन्मदाखल्याच्या नावाखाली पैशांची कथित उकळपट्टी?

सरकारी सेवा की ‘वसुली केंद्र’? नागरिकांकडून चौकशीची मागणी

अरविंद बेंडगा 

पालघर जिल्हा प्रतिनिधी 

7798185755

पालघर जिल्ह्यातील डहाणू तालुक्यातील कासा उपजिल्हा रुग्णालयाच्या कारभाराबाबत गंभीर आरोप समोर आल्याने आरोग्य विभागाच्या कार्यपद्धतीवर प्रश्न उपस्थित केले जात आहेत. जन्मदाखला देणे तसेच त्यामधील दुरुस्ती प्रक्रियेदरम्यान नागरिकांकडून पैसे घेतले जात असल्याचा आरोप करण्यात आला असून, या प्रकारामुळे स्थानिक नागरिकांमध्ये नाराजी व्यक्त होत आहे.

आष्टे धांगडपाडा येथील मिथुन देवजी धांगडा यांनी आरोप केला की, मुलाचा जन्मदाखला मिळवण्यासाठी प्रथम रुग्णालयात गेल्यावर त्यांच्याकडून १०० रुपये घेण्यात आले. त्यानंतर जन्मदाखल्यामध्ये त्रुटी असल्याने दि. २७ जून २०२६ रोजी दुरुस्तीसाठी पुन्हा रुग्णालयात गेल्यावर १५० रुपये घेतल्याचा दावा त्यांनी केला.

याबाबत बोलताना त्यांनी सांगितले, “आम्ही रोजंदारीवर कष्ट करून कुटुंबाचा उदरनिर्वाह करतो. सरकारी सेवेसाठीही पैसे मोजावे लागत असतील, तर ही अत्यंत दुर्दैवी बाब आहे.”

या प्रकरणामुळे अनेक प्रश्न उपस्थित केले जात आहेत. जन्मदाखल्यासाठी शासनाने अधिकृत शुल्क निश्चित केले आहे का? शुल्क असल्यास नागरिकांना अधिकृत पावती दिली जाते का? आणि शुल्क नसल्यास पैसे कोणत्या नियमांनुसार घेतले जात आहेत? याबाबत प्रशासनाने स्पष्ट भूमिका घ्यावी, अशी मागणी नागरिकांकडून होत आहे.

दरम्यान, या प्रकरणात आणखी एक आरोप समोर आला आहे. कासा उपजिल्हा रुग्णालयातील दंत सहाय्यक (वर्ग-४ कर्मचारी) सोमनाथ रुद्राक्ष हे संगणकावर बसून जन्मदाखले तयार करून वितरण करत असल्याचा दावा काही नागरिकांनी केला आहे.

स्थानिक नागरिकांनी प्रश्न उपस्थित केला आहे की, संबंधित कर्मचारी जर दंत विभागाशी संबंधित असतील तर त्यांना दाखले प्रक्रिया करण्याचे अधिकार आहेत का? तसेच कार्यालयीन कामकाज व शुल्क प्रक्रिया कोणाच्या निर्देशानुसार केली जाते? याची चौकशी होणे आवश्यक असल्याचे मत व्यक्त करण्यात येत आहे.

नागरिकांनी या संपूर्ण प्रकरणाची निष्पक्ष व उच्चस्तरीय चौकशी करून सत्य जनतेसमोर आणावे, तसेच चौकशीत गैरप्रकार आढळल्यास संबंधितांवर कायदेशीर व प्रशासकीय कारवाई करावी, अशी मागणी केली आहे.

ठळक मुद्दे :

• जन्मदाखला व दुरुस्ती प्रक्रियेत ₹१०० ते ₹१५० घेतल्याचा आरोप

• दंत सहाय्यकाकडून कार्यालयीन कामकाज केल्याचा दावा

• दाखले वितरण प्रक्रियेबाबत प्रश्नचिन्ह

• संपूर्ण प्रकरणाच्या चौकशीची नागरिकांची मागणी

प्रतिक्रिया :

“संबंधित प्रकरणाची सखोल व निष्पक्ष चौकशी करण्यात येईल. चौकशीत कोणताही गैरप्रकार अथवा नियमभंग आढळल्यास संबंधित अधिकारी किंवा कर्मचाऱ्याविरुद्ध शासनाच्या नियमांनुसार योग्य ती प्रशासकीय व कायदेशीर कारवाई करण्यात येईल.”

— डॉ. रामदास मराड

जिल्हा शल्य चिकित्सक, पालघर