मनोज एल खोब्रागडे
✍🏻मुख्य संपादक ✍🏻
मो. 8208166961
खमारी (गोंदिया):-
स्थानिक जिल्हा परिषद प्राथमिक शाळा (मुली), खमारी (केंद्र खमारी, पंचायत समिती व जिल्हा गोंदिया) येथे आज, ६ ऑक्टोबर २०२६ पासून विद्यार्थिनींसाठी कराटे, लाठी-काठी, तलवारबाजी व नॉन-चाक (Nunchaku) यांचे विशेष मोफत प्रशिक्षण वर्ग सुरू करण्यात आले आहेत. खमारी गावाचे सुपुत्र व माजी सैनिक मा. अजयजी खानोरकर यांच्या पुढाकाराने हा उपक्रम राबविला जात आहे.
आजच्या काळात मुलींमध्ये आत्मविश्वास निर्माण होणे आणि त्यांनी स्वसंरक्षणासाठी सक्षम बनणे अत्यंत गरजेचे आहे. याच उद्देशाने माजी सैनिक अजय खानोरकर यांनी शाळेतील मुलींना आत्मसंरक्षणाचे धडे देण्याचे ठरवले आहे. त्यांच्या या उपक्रमाचे खमारी गाव व परिसरातून मोठ्या प्रमाणावर कौतुक होत आहे.
शाळेचे मुख्याध्यापक श्री. दिनेश डोंगरे, शाळा व्यवस्थापन समितीचे अध्यक्ष श्री. रामप्रसाद फुंडे, समितीचे सर्व सदस्य, शाळेतील शिक्षकवृंद श्रीम. तृप्ती बावणे व श्री. निलेश गवई तसेच स्वयंसेवक, सर्व पालक व गावकऱ्यांनी माजी सैनिक अजय खानोरकर यांच्या या सामाजिक दातृत्वाबद्दल व पुढाकाराबद्दल मनापासून आभार मानले.
मुलींच्या अभ्यासावर परिणाम होऊ न देता, विद्यार्थ्यांना दररोज दुपारी ४ ते ५ या वेळेत हे प्रशिक्षण दिले जाईल, असे शाळेच्या वतीने निश्चित करण्यात आले आहे. या प्रशिक्षणामुळे शाळेतील विद्यार्थिनींमध्ये मोठा उत्साह पाहायला मिळत असून पालकांनीही या उपक्रमाचे स्वागत केले आहे.
Post a Comment
0 Comments