महिला व बाल रुग्णालयातील आरोग्य सुविधांचा आढावा.
कमलापूर हत्ती कॅम्प परिसरातील रस्ते, पार्किंगसह विविध विकासकामांची पाहणी.
मधुकर गोंगले, गडचिरोली जिल्हा प्रतिनिधी. मो. नं. 9420751809.
गडचिरोली, दि. २५ :- अहेरी तालुक्यात सुरू असलेली विविध विकासकामे दर्जेदार व निर्धारित वेळेत पूर्ण करण्यासोबतच दुर्गम भागातील नागरिकांना आरोग्य, शिक्षण व इतर शासकीय सेवा प्रभावीपणे उपलब्ध करून देण्यावर भर द्यावा, अशा सूचना जिल्हाधिकारी अविश्यांत पंडा यांनी आज दिल्या. अहेरी तालुक्याच्या दिवसभराच्या दौऱ्यात त्यांनी आरोग्य सुविधा, महसूल प्रशासन, जलसंधारण, आदिवासी विकास विभागाच्या शैक्षणिक संस्था तसेच विविध पायाभूत विकासकामांची प्रत्यक्ष पाहणी करून संबंधित अधिकाऱ्यांकडून प्रगतीचा आढावा घेतला.
जिल्हाधिकाऱ्यांच्या दौऱ्याची सुरुवात प्राणहिता पोलीस मुख्यालय, अहेरी येथून झाली. त्यानंतर त्यांनी महसूल विभागाच्या कामकाजाचा आढावा घेतला. तालुकास्तरावरील महसूल प्रकरणांची सद्यस्थिती, प्रलंबित प्रकरणे तसेच नागरिकांना दिल्या जाणाऱ्या विविध सेवांची माहिती त्यांनी घेतली.
महिला व बाल रुग्णालयातील सुविधांचा सविस्तर आढावा.
जिल्हाधिकारी पंडा यांनी अहेरी येथील महिला व बाल रुग्णालय तसेच उपजिल्हा रुग्णालयाला भेट देऊन उपलब्ध आरोग्य सुविधा, पायाभूत सोयी आणि रुग्णालयाच्या कामकाजाचा सविस्तर आढावा घेतला. रुग्णालयातील डॉक्टर, परिचारिका व इतर कर्मचाऱ्यांच्या उपलब्ध मनुष्यबळाची सद्यस्थिती त्यांनी जाणून घेतली. रुग्णालयात आवश्यक यंत्रसामग्री उपलब्ध असून डॉक्टरांची काही पदे रिक्त असल्याचे यावेळी निदर्शनास आले. रिक्त डॉक्टर पदे भरण्याबाबत वरिष्ठ स्तरावर पाठपुरावा करण्यात येईल, असे जिल्हाधिकारी पंडा यांनी सांगितले.
रुग्णालयातील रुग्ण व कर्मचाऱ्यांच्या सुरक्षिततेच्या दृष्टीने फायर ऑडिट करण्यात आले आहे का, याबाबत जिल्हाधिकाऱ्यांनी विशेष विचारणा केली. तसेच विद्युत उपकरणे व विद्युत व्यवस्थेच्या सुरक्षा ऑडिटची सद्यस्थिती आणि त्यानुषंगाने आवश्यक अनुपालन करण्यात आले आहे का, याची माहिती घेतली. अग्निसुरक्षेशी संबंधित आवश्यक उपाययोजना तसेच सुरक्षा ऑडिटमधील सूचनांचे काटेकोरपणे पालन करण्याच्या सूचना त्यांनी संबंधितांना दिल्या.
रुग्णालयाच्या इमारतीत पावसाळ्यात होणारी छताची गळती तसेच आवश्यक किरकोळ दुरुस्तीची कामे तातडीने पूर्ण करण्याच्या सूचना त्यांनी दिल्या. आरोग्यविषयक पायाभूत सुविधांची नियमित देखभाल करण्याबाबत डॉक्टर व संबंधित अधिकाऱ्यांशी संवाद साधून अडचणी जाणून घेतल्या.
रक्त संकलन युनिट लवकर कार्यान्वित करा.
अहेरी रुग्णालयातील रक्त संकलन युनिटला प्रशासनाची मान्यता मिळाली असून ते लवकरात लवकर कार्यान्वित करण्याच्या दृष्टीने जिल्हाधिकाऱ्यांनी सद्यस्थितीचा आढावा घेतला. युनिट सुरू करण्यासाठी काही प्रशासकीय अथवा तांत्रिक अडचणी आहेत का, याची माहिती घेऊन आवश्यक कार्यवाहीला गती देण्याच्या सूचना त्यांनी संबंधित अधिकाऱ्यांना दिल्या.
अहेरीसह परिसरातील दुर्गम भागातील नागरिकांना स्थानिक पातळीवर अधिक सक्षम आरोग्य सेवा उपलब्ध होण्याच्या दृष्टीने हे युनिट महत्त्वाचे ठरणार आहे. दुर्गम व आदिवासीबहुल भागातील नागरिकांना वेळेत व दर्जेदार आरोग्य सेवा मिळाव्यात, यासाठी आरोग्य यंत्रणा अधिक सक्षम करण्यावर प्रशासनाचा भर असल्याचे जिल्हाधिकारी पंडा यांनी सांगितले.
आलापल्लीतील संरक्षण भिंत व नाला सरळीकरण कामांची पाहणी.
आलापल्ली परिसरात सुरू असलेल्या संरक्षण भिंत आणि नाला सरळीकरणाच्या कामांची जिल्हाधिकाऱ्यांनी प्रत्यक्ष पाहणी केली. पावसाळ्यात पाण्याचा निचरा सुरळीत व्हावा तसेच संभाव्य पूरस्थितीमुळे नागरिकांचे नुकसान होऊ नये, या दृष्टीने करण्यात येणाऱ्या उपाययोजनांची त्यांनी माहिती घेतली. कामांची गुणवत्ता कायम राखून ती निर्धारित वेळेत पूर्ण करण्याच्या सूचना संबंधित यंत्रणेला दिल्या.
त्यानंतर त्यांनी ताटीगुडम या 'सेवा संपृक्त अभियाना' अंतर्गत निवडलेल्या गावाला भेट दिली. तसेच एकात्मिक आदिवासी विकास प्रकल्प कार्यालय, अहेरी येथे आदिवासी विकास विभागामार्फत राबविण्यात येणाऱ्या विविध योजना व उपक्रमांचा त्यांनी आढावा घेतला. योजनांची अंमलबजावणी, शैक्षणिक सुविधा तसेच विविध योजनांचा लाभ पात्र आदिवासी लाभार्थ्यांपर्यंत प्रभावीपणे पोहोचविण्याबाबत संबंधित अधिकाऱ्यांशी चर्चा केली.
कमलापूर हत्ती कॅम्प परिसरातील कामांचा आढावा
सायंकाळी जिल्हाधिकारी पंडा यांनी कमलापूर हत्ती कॅम्प परिसराला भेट दिली. हत्ती कॅम्पकडे जाणाऱ्या मार्गावरील रस्त्यांची कामे, पार्किंगसह परिसरातील विविध पायाभूत कामांची त्यांनी प्रत्यक्ष पाहणी केली. कामांची सद्यस्थिती व प्रगती जाणून घेऊन ती गुणवत्तापूर्ण पद्धतीने पूर्ण करण्याच्या सूचना संबंधित अधिकाऱ्यांना दिल्या.
दौऱ्याच्या शेवटच्या टप्प्यात जिल्हाधिकाऱ्यांनी विविध विभागप्रमुख व संबंधित अधिकाऱ्यांशी संवाद साधून विकासकामांच्या प्रगतीसह नागरिकांना उपलब्ध करून देण्यात येणाऱ्या शासकीय सेवांचा आढावा घेतला. प्रलंबित कामांना गती देऊन दुर्गम भागातील नागरिकांना शासकीय योजना व सेवा प्रभावीपणे उपलब्ध करून देण्याच्या सूचना त्यांनी यावेळी दिल्या.
यावेळी सहायक जिल्हाधिकारी अजय डोके, उपविभागीय अधिकारी प्रशांत पिसाळ, तहसीलदार बालाजी सोमवंशी, वनपरिक्षेत्र अधिकारी नारायण इंगळे, प्रभारी जिल्हा नियोजन अधिकारी रमेश पेरगू यांच्यासह संबंधित विभागांचे अधिकारी उपस्थित होते.
Post a Comment
0 Comments